Prato Sargadelos

Este prato, producido pola Real Fábrica de Sargadelos, presenta un perfil circular con bordo ondulado, un recurso formal frecuente na louza industrial do século XIX. O campo central está ocupado por unha escena paisaxística de inspiración orientalizante.

A decoración realízase mediante estampación e aplicación de óxidos azuis, técnica que permite unha elevada precisión no debuxo e unha reprodución seriada do motivo. O bordo do prato está tratado cunha cenefa ornamental continua, baseada en formas vexetais e curvas rítmicas que encadran a escena central e reforzan a unidade visual da peza. Esta orla funciona como transición entre o espazo figurativo interior e o límite físico do obxecto.

Desde o punto de vista estilístico, a peza inscríbese na tradición europea da “chinoiserie”, amplamente difundida na cerámica inglesa e continental desde o século XVIII e adoptada por Sargadelos. O óxido que daba esa cor azul á decoración era óxido de cobalto. Non se trata dunha representación fiel da paisaxe asiática, senón dunha visión idealizada e occidentalizada, na que os elementos arquitectónicos e humanos actúan como signos exóticos recoñecibles.